Cantos sentimentos opostos tivemos estos días! Tristura porque remata CantoConto! ata despois do verán; alegría porque tiñamos o noso amigo Pablo Díaz nas bibliotecas para facer unha festa ben fermosa; ledicia de ver a tantos nenos e maiores gozar cos contos e as cancións de Pablo; mágoa porque é moi fermoso ver a biblioteca tan buliciosa e ímolo botar de menos.
Pablo cantounos canción dos seus discos, todos grandes éxitos entre os pequerrechos, e que podedes levar prestados das bibliotecas.
Pero, entre tanto e ata que chegue o outono, seguiremos visitando as bibliotecas, que non pechamos durante o verán, claro que non! E lendo e levando para casa contos coma os que nos contou Pablo: “Un becho estraño“, “Un, dous, tres, qué ves?“, “O gato lambón“, “Os de arriba e os de abaixo“, “Paco“, “Paxariña“…
Deixámosvos unhas fotos das sesións, para que vexades qué ben o pasamos. Esperamos vervos a volta do verán. Grazas, familias!
ESPAZO INFANTIL E XUVENIL 
Que ben o pasamos con Pablo!!
Gracias á biblioteca Forum por facernos sentir TAN ben, e especialmente, GRACIAS Marta e Xiana polo voso cariño, a vosa paciencia e o voso bon facer. Marabilloso atoparse con profesionais coma vos, sen deixar de mencionar por suposto a vosa calidade humán. UN VERDADEIRO PRACER!!
Mil bicos, votarémosvos moito de menos.
Martín e mamá (Ana😉).
Martín e Ana, o pracer é noso! Contar con público incondicional e usuarios deliciosos coma vós, fan o noso traballo máis fermoso.
É marabilloso atopar xente tan implicada como Martín e ti no día a día da Biblioteca, e como non, en actividades de promoción lectora como CantoConto!
Tedes un curruncho moi especial nos nosos corazóns. E tamén na Biblioteca, onde agardamos vervos para seguir a compartir momentos máxicos e descubrir novas lecturas, xa que Martín se nos fai maior!
Bicos e apertas, Marta e Xiana.