“Pregúntome se as estrelas estás acendidas coa fin de que cada un·ha poida atopar a súa algún día” – O Principiño (Saint- Exupéry)
Din que cada noite, o Sol se pon máis aló do horizonte e que os últimos raios pintan o ceo con infinidade de cores. Tamén din que cando chega a noite, esas cores dan paso a un escuro e profundo ceo cuberto de pequenas estrelas, miúdos astros que relocen con tanta forza que ata deixan entrever o máis grande que existe: o Universo no que vivimos.
É por iso que este outono vos queremos agasallar cun “boleto de ida e volta” para percorrer, a golpe de foguete, o noso particular espazo astral ou Milky Way.
Are you ready? 3, 2, 1… DESPEGAMOS!
Co dobre obxectivo de espertar o interese polo mundo da Astronomía e estimular a curiosidade dende idades temperás, poñemos á vosa disposición a selección de contos MILKY WAY (ou Vía Láctea)… unha achega ás estrelas!
MILKY WAY (ou Vía Láctea) é unha escolma composta por cincuenta historias reais e de fición que vos permitirán viaxar no tempo e descubrir, a través de cada lectura, o que atesouran as galaxias, as estrelas, o sol e a lúa, e máis os planetas (que dan voltas de forma divertida e engaiolante).
Como recurso á totalidade das lecturas, e coa fin de que o público miúdo poida afianzar a súa percepción xeral da natureza, poñemos á vosa disposición algunhas propostas didáctico-creativas para realizar na casa ou mesmo na escola:
- Na busca de respostas (recursos educativos para xogar coa ciencia e tecnoloxía).
- Universo II (propostas didácticas destinadas ao tramo de Educación Infantil).
- Space Themed Crafts (recursos divertidos cos que xogar, crear e aprender).
Máis nada que vos convidar ao noso espazo para deixarvos levar polo amplo universo que temos montado (tamén expandido por riba dos 8 anos). De seguro que Ata o infinito… e máis alá! é un complemento perfecto para que poidades despegar dirección o ceo, tocar as estrelas e facervos cunha delas! Confeso que, hai tempo, xa gardei as miñas 🌟🌟
ESPAZO INFANTIL E XUVENIL 
Deixar un comentario