Ás veces tes sentimentos de tristeza? Dás brincos de felicidade? Que ocorre cando notas como os teus ollos se enchen de bágoas pero non estás enfadado/a? Repartes bicos a moreas ou pola contra sentes medo?…
Deixando atrás as fresquiñas sandías e os doces xeados (xa degustados polos nosos usuarios e usuarias), achegámosvos unha nova proposta estival baseada na exploración das emocións e con cheiro a salitre.
A mostra bibliográfica MANS ARRIBA… ISTO É UN ABRAZO! é a nosa particular revolución “cangrexil”. Crustáceos molones que recomendan lecturas coa fin de descubrir as emocións, coñecelas e falar delas.
Á vosa disposición unha escolma de 50 títulos infantís. Historias xenéricas (Así es mi corazón e Emocionario), que tratan a afectividade (El primer beso, La gran fábrica de las palabras e Te quiero… casi siempre), que fan referencia á amizade verdadeira (Calma, Adiós manoplas, El león y el pájaro e Amigos), que deixan entrever os celos (Los fantasmas no llaman a la puerta e Cuando estoy celoso), que falan do enfado (Desavenencia), da tristeza (Grisela) ou dos medos (Mis pequeños miedos). Tamén contos nos que os personaxes se senten incomprendidos (Cuervo e Todos menos uno), amosan sentimentos de perda (Más allá del gran río), entusiasmo (El punto) e descubren o bo de ser diferente (Malena Ballena e Monstruo Rosa), entre outras propostas que poderedes curiosear nunha visita á Biblioteca.
E como agasallo… este ticket canxeable por un ABRAZO! Máis nada que esperar a vosa visita coas MANS ARRIBA! Feliz entrada do verán e, por suposto, boa noite de San Xoán!
Deixar un comentario